നാവികര്‍ ജുഡീഷ്യല്‍ കസ്റ്റഡിയില്‍
- Last Updated on 05 March 2012
കൊല്ലം: ഇറ്റാലിയന്‍ കപ്പല്‍ 'എന്‍റിക്ക ലെക്‌സി'യില്‍ നിന്ന് വെടിവച്ച് രണ്ട് മത്സ്യത്തൊഴിലാളികളെ കൊലപ്പെടുത്തിയെന്ന കേസിലെ പ്രതികളായ ലൊസ്റ്റാറോ മാസ്ലിമിലാനോ, സാല്‍വത്തോറോ ജിലോണ്‍ എന്നിവരെ പതിനാല് ദിവസത്തേക്ക് ജുഡീഷ്യല്‍ കസ്റ്റഡിയില്‍ വിടാന്‍ കൊല്ലം ചീഫ് ജുഡീഷ്യല്‍ മജിസ്‌ട്രേറ്റ് എ.കെ.ഗോപകുമാര്‍ ഉത്തരവിട്ടു.
ഇവരെ പൂജപ്പുര സെന്‍ട്രല്‍ ജയിലിലേക്ക് കൊണ്ടുപോകും. ജയിലില്‍ ഇവര്‍ക്ക് ഇറ്റാലിയന്‍ ഭക്ഷണം നല്‍കാനും കോടതി ഉത്തരവിട്ടു. ദിവസത്തില്‍ ഒരു നേരം ഇറ്റലിയില്‍ നിന്നുള്ള ഒരു പ്രതിനിധിയെ കാണാനുള്ള അനുവാദവും നല്‍കി.
പോലീസ് കസ്റ്റഡി തിങ്കളാഴ്ച അവസാനിച്ചതിനെ തുടര്‍ന്നാണ് പ്രതികളെ കൊല്ലം ചീഫ് ജുഡീഷ്യല്‍ മജിസ്‌ട്രേറ്റ് എ.കെ.ഗോപകുമാര്‍ മുമ്പാകെ ഹാജരാക്കിയത്. കനത്ത സുരക്ഷയ്ക്ക് നടുവിലാണ് പ്രതികളെ കോടതിയില്‍ കൊണ്ടുവന്നത്.
പ്രോസിക്യൂഷനുവേണ്ടി ഡെപ്യൂട്ടി ഡയറക്ടര്‍ ഓഫ് പ്രോസിക്യൂഷന്‍ കെ.ഒ.രാജു ഹാജരായി. പ്രതികള്‍ക്കുവേണ്ടി രാമന്‍ പിള്ള, സുനില്‍കുമാര്‍ എന്നിവരാണ് ഹാജരായത്.