മലയാള പഠനത്തിന് പകുതി കോളേജിലും അവസരമില്ല
- Last Updated on 10 May 2012
- Hits: 2
തിരുവനന്തപുരം: മാതൃഭാഷയ്ക്ക് ക്ലാസ്സിക്കല്‍ പദവി ലഭിക്കുന്നതിനുള്ള നടപടികള്‍ ഒരു ഭാഗത്ത് തകൃതിയായി നടക്കുമ്പോള്‍ മലയാളഭാഷാ പഠനത്തിനുള്ള അവസരം കുറവാണെന്ന് ചൂണ്ടിക്കാണിക്കപ്പെടുന്നു. 40 സര്‍ക്കാര്‍ കോളേജുകളുള്ളതില്‍ 13 ഇടത്തു മാത്രമാണ് മലയാള ബിരുദ കോഴ്‌സുള്ളത്. തമിഴ്‌നാട്, കര്‍ണാടക സംസ്ഥാനങ്ങളില്‍ മാതൃഭാഷ
പഠിക്കാന്‍ എല്ലാ സര്‍ക്കാര്‍ കോളേജിലും അവസരമുണ്ടായിരിക്കെയാണ് കേരളത്തില്‍ പകുതി കോളേജുകളില്‍പ്പോലും മലയാളം ബി.എ. ഇല്ലാത്തത്.
സംസ്ഥാനത്തെ എല്ലാ സര്‍ക്കാര്‍ കോളേജുകളിലും മലയാളം ബിരുദ, ബിരുദാനന്തര കോഴ്സുകള് അനുവദിക്കണമെന്ന് നിയമസഭാ സമിതി ശുപാര്‍ശ നല്‍കിയിരുന്നു. പാലോട് രവി അധ്യക്ഷനായ സമിതിയാണ് ഈ ശുപാര്‍ശ നല്‍കിയത്. എന്നാല്‍ ഇതിന്മേല്‍ ഒരു നടപടിയും സര്‍ക്കാര്‍ സ്വീകരിച്ചിട്ടില്ല. സര്‍ക്കാര്‍ കോളേജുകളില്‍ 13 ഇടത്ത് മലയാളം ബി.എ. ഉള്ളപ്പോള്‍ എം.എ. മലയാളമുള്ളത് ആറ് കോളേജുകളില്‍ മാത്രമാണ്.
നെടുമങ്ങാട്, ആറ്റിങ്ങല്‍, കാഞ്ഞിരംകുളം, മടപ്പള്ളി, അമ്പലപ്പുഴ, മണിമലക്കുന്ന് കോളേജുകളില്‍ ബി.എ. മലയാളവും പാലക്കാട്, തിരൂര്‍, പേരാമ്പ്ര, ചിറ്റൂര്‍, കോഴിക്കോട്, കണ്ണൂര്‍ സര്‍ക്കാര്‍ കോളേജുകളില്‍ എം.എ. മലയാളവും തുടങ്ങണമെന്നാണ് പ്രിന്‍സിപ്പല്‍മാര്‍ ആവശ്യപ്പെട്ടിരിക്കുന്നത്.
ഭാഷാവിഷയങ്ങള്‍ക്ക് 1:70 എന്ന അനുപാതമാണ് നിലവിലുള്ളത്. അത് 1:50 ആക്കണമെന്ന നിര്‍ദേശവും നടപ്പായിട്ടില്ല. ഭാഷാവിഷയങ്ങള്‍ക്ക് കൂടുതല്‍ പഠനാവസരം ഒരുങ്ങുന്നത് മാതൃഭാഷയുടെ നിലവാരം ഉയരുന്നതിന് കാരണമാകും; ഒപ്പം കൂടുതല്‍ പേര്‍ക്ക് അധ്യാപനത്തിനുള്ള അവസരമൊരുക്കുകയും ചെയ്യും.