രണ്ടുമാസത്തിനിടെ നിരത്തില്‍ പൊലിഞ്ഞത് 698 ജീവന്‍
- Last Updated on 06 April 2012
- Hits: 3
തിരുവനന്തപുരം: സംസ്ഥാനത്ത് റോഡപകടങ്ങള്‍ അസാധാരണമാംവിധം വര്‍ധിക്കുന്നു. രണ്ടുമാസത്തിനുള്ളില്‍ റോഡില്‍ മരിച്ചവരുടെ എണ്ണം 698. ഇതില്‍ എണ്‍പതുശതമാനവും ബൈക്ക് യാത്രികരും കാല്‍നടക്കാരുമാണ്. മരിച്ച ബൈക്ക് യാത്രികരില്‍ പകുതിയിലേറെപ്പേരും ഹെല്‍മെറ്റ് ധരിച്ചിരുന്നില്ലെന്നും കണക്കുകള്‍ വ്യക്തമാക്കുന്നു. റോഡപകടങ്ങളുടെ ഭയാനകമായ സ്ഥിതിയെക്കുറിച്ച്
കേരളപോലീസാണ് കണക്കുകള്‍ പുറത്തുവിട്ടത്.
ട്രാഫിക് അപകടങ്ങള്‍ കുറയ്ക്കുന്നതിന്റെ ഭാഗമായി ജനവരി, ഫിബ്രവരി മാസങ്ങളിലെ അപകടങ്ങളെക്കുറിച്ച് കേരള പോലീസ് വിശദമായ പഠനം നടത്തിയിരുന്നു. പഠനത്തില്‍ വ്യക്തമായ ഞെട്ടിക്കുന്ന കണക്കുകള്‍ ഇങ്ങനെ: ജനവരി, ഫിബ്രവരി മാസങ്ങളില്‍ കേരളത്തിലെ റോഡുകളില്‍ നടന്ന അപകടങ്ങളെത്തുടര്‍ന്ന് 698 പേര്‍ മരിച്ചു; ഒരുദിവസം ശരാശരി പത്തിലധികം പേര്‍ ! 309 ഇരുചക്ര വാഹനയാത്രികരും 241 കാല്‍നടക്കാരുമാണ് കഴിഞ്ഞ രണ്ടുമാസത്തില്‍ മരിച്ചത്.
ഇത് മൊത്തം മരിച്ചവരുടെ എണ്‍പതുശതമാനത്തിലധികം വരും. കാറിലും ബസ്സിലും യാത്രചെയ്യവേയുണ്ടായ അപകടങ്ങളില്‍ മരിച്ചവര്‍ പത്തുശതമാനം മാത്രം. ഇരുചക്രവാഹനയാത്രക്കാരുടെ മരണങ്ങളില്‍ 90 ശതമാനവും തലയ്‌ക്കേറ്റ ക്ഷതം മൂലമാണ് സംഭവിച്ചിരിക്കുന്നത്. അപകടസമയത്ത് ഹെല്‍മെറ്റ് ഉപയോഗിച്ചിരുന്നുവെങ്കില്‍ ഈ മരണങ്ങളില്‍ പകുതിയിലധികവും ഒഴിവാക്കാമായിരുന്നു.
മരണമടഞ്ഞ കാല്‍നടക്കാരുടെ കണക്കുകള്‍ മറ്റൊരു പ്രശ്‌നത്തിലേക്ക് വിരല്‍ ചൂണ്ടുന്നു. മരിച്ച 241 കാല്‍നടക്കാരില്‍ 148 പേരും 50 വയസ്സ് കഴിഞ്ഞവരാണ്. അതായത് 61 ശതമാനം. പ്രായാധിക്യമുള്ളവര്‍ റോഡ് മുറിച്ചുകടക്കുമ്പോഴോ റോഡരികിലൂടെ നടക്കുമ്പോഴോ, ഡ്രൈവര്‍മാര്‍ യാതൊരു പരിഗണനയും നല്‍കുന്നില്ല. ചീറിപ്പായുന്ന വാഹനങ്ങളുടെ ഇടയിലൂടെ റോഡ് മുറിച്ചുകടക്കാനും കുതറിമാറാനും നിസ്സഹായരായ ഇവര്‍ക്ക് കഴിയുന്നുമില്ല.
ഇനി അപകടങ്ങളുടെ മറ്റ് ചില കണക്കുകള്‍ പരിശോധിക്കാം. ഏറ്റവുമധികം പേര്‍ മരിച്ചത് ലോറികള്‍ പോലുള്ള ഹെവിവാഹനങ്ങളുടെ ഇടിയേറ്റാണ്. 183 പേര്‍ക്ക് ഇങ്ങനെ ജീവന്‍ നഷ്ടപ്പെട്ടിട്ടുണ്ട്. ഇതില്‍ 56 പേരും കാല്‍നടക്കാരാണ്. എന്നാല്‍ കാല്‍നടക്കാരെ ഏറ്റവുമധികം കൊലപ്പെടുത്തിയത് ഇരുചക്രവാഹനങ്ങളാണ്. കഴിഞ്ഞ രണ്ടുമാസങ്ങളില്‍ റോഡരികിലൂടെ നടന്നുപോയ 74 പേരെ ഇരുചക്രവാഹനങ്ങള്‍ കൊലപ്പെടുത്തി. ഏഴ് സൈക്കിള്‍ യാത്രക്കാരുടെ ജീവനും ഇങ്ങനെ നഷ്ടപ്പെട്ടു. ഓട്ടോറിക്ഷയിടിച്ച് 17 കാല്‍നടക്കാര്‍ മരിച്ചു. കാറിടിച്ച് മരിച്ചവരുടെ എണ്ണം 64.
ഒരു വാഹനത്തിലും ഇടിക്കാതെ സ്വയം വാഹനമോടിച്ച് മരണത്തിലേക്ക് കടന്നവരുടെ എണ്ണവും ചെറുതല്ല. 122 പേരാണ് ഇപ്രകാരം മരിച്ചത്. ഇതില്‍ 69 പേര്‍ ബൈക്ക് യാത്രികരാണ്. ഓട്ടോറിക്ഷയില്‍ സഞ്ചരിച്ച 17 പേരും കാറില്‍ സഞ്ചരിച്ച 16 പേരും ഇപ്രകാരം മരിച്ചു.
സംസ്ഥാനത്ത് റോഡപകടങ്ങള്‍ വര്‍ധിച്ചുവരുന്നത് ആശങ്കയുണര്‍ത്തുന്നതായി ഡി.ജി.പി ജേക്കബ് പുന്നൂസ് പറഞ്ഞു. ട്രാഫിക് നിയമങ്ങള്‍ അനുസരിക്കാന്‍ പൊതുജനങ്ങളും നിയമങ്ങള്‍ കര്‍ശനമായി നടപ്പാക്കാന്‍ പോലീസും ശ്രമിച്ചാല്‍ മാത്രമേ മരണനിരക്ക് കുറയ്ക്കാന്‍ കഴിയൂ. ട്രാഫിക് ബോധവത്ക്കരണ പരിപാടികള്‍ ഊര്‍ജിതമാക്കാന്‍ ഒരു കോടി രൂപ റോഡ് സുരക്ഷാ ഫണ്ടില്‍ നിന്ന് അനുവദിച്ചിട്ടുണ്ട്.
പതിനായിരത്തോളം സ്റ്റുഡന്റ് പോലീസ് കേഡറ്റുകള്‍ ഏപ്രില്‍ 17 മുതല്‍ പത്തുദിവസത്തെ ബോധവല്‍ക്കരണ പരിപാടികള്‍ നടത്തുമെന്നും ഡി.ജി.പി അറിയിച്ചു. വരിവരിയായി വാഹനം തടഞ്ഞുനിര്‍ത്തിയുള്ള വാഹന പരിശോധന ഒഴിവാക്കാനും ജനങ്ങളെ ശിക്ഷിക്കുന്നതിന് പകരം ബോധവത്ക്കരിക്കാനും ഡി.ജി.പി നിര്‍ദേശം നല്‍കിയിട്ടുണ്ട്. എല്ലാജില്ലകളിലും നിരീക്ഷണ ക്യാമറകള്‍ ഏര്‍പ്പെടുത്തുമെന്നും മദ്യപിച്ച് വാഹനമോടിക്കുന്നവരെ കണ്ടെത്താന്‍ 400 ആല്‍ക്കോമീറ്റര്‍ വാങ്ങുമെന്നും ഡി.ജി.പി അറിയിച്ചു.