വയനാട് മഹോത്സവത്തിന് ഇന്ന് തുടക്കം

Written by See News Category: WYD
Published on 23 December 2011 Hits: 6

കല്പറ്റ: വയനാട് മഹോത്സവം വെള്ളിയാഴ്ച കല്പറ്റ എസ്.കെ.എം.ജെ. ഹയര്‍ സെക്കന്‍ഡറി മൈതാനത്ത് തുടങ്ങും. ഉത്സവത്തിന്റെ മുന്നോടിയായി മൂന്നു മണിക്ക് എന്‍.എസ്.എസ്.സ്‌കൂളില്‍ നിന്നാരംഭിക്കുന്ന സാംസ്‌കാരിക ഘോഷയാത്രയില്‍ വയനാടിന്റെ തനതു കലാരൂപങ്ങള്‍, മാസ്ഡ്രില്‍, ഡ്രംസെറ്റ്, പുലിക്കളി, ഫേ്‌ളാട്ടുകള്‍ എന്നിവ അണിനിരക്കും. വൈകിട്ട് എസ്.കെ.എം. ജെ.യില്‍ നടക്കുന്ന ഉദ്ഘാടന സമ്മേളനത്തില്‍ ചലച്ചിത്രതാരവും അമ്മ പ്രസിഡന്റുമായ ഇന്നസെന്റ്, മന്ത്രി പി.കെ.ജയലക്ഷ്മി എന്നിവര്‍ മുഖ്യാതിഥികളാകും. തുടര്‍ന്ന് ശങ്കര്‍ മഹാദേവന്റെ ഗാനമേള. അനുഷാമണി, രാമന്‍ മഹാദേവന്‍ എന്നിവരും ഗാനങ്ങളാലപിക്കും. തുടര്‍ന്ന് കോമഡി താരം രാജാസാഹിബിന്റെ കോമഡിപ്രോഗ്രാം. ശനിയാഴ്ച വൈകിട്ട് വിജയ്‌യേശുദാസ് നയിക്കുന്ന ഗാനസന്ധ്യയില്‍ കൊല്ലം ഷാഫി, ഐഡിയ സ്റ്റാര്‍സിങ്ങര്‍ ഫെയിം മൃദുല, കീര്‍ത്തന എന്നിവര്‍ പാടും. ടിനി ടോം അവതരിപ്പിക്കുന്ന കോമഡിഷോ, ചലച്ചിത്രതാരം മീരാനന്ദന്റെ നൃത്ത പരിപാടി എന്നിവ തുടര്‍ന്ന് നടക്കും. ക്രിസ്മസ് ദിനത്തില്‍ നടക്കുന്ന സമാപന സമ്മേളനത്തില്‍ ടൂറിസം മന്ത്രി എ.പി.അനില്‍കുമാര്‍ മുഖ്യാതിഥിയായിരിക്കും.

 

മനുവിന്റെ കുടുംബത്തിന് സഹായധനം നല്‍കി

Written by See News Category: WYD
Published on 14 December 2011 Hits: 17

കമ്പളക്കാട്: താമരക്കൊല്ലി കോളിനയിലെ മനുവിന്റെ ആശ്രിതര്‍ക്ക് 50,000രൂപ ധനസഹായം എം.വി. ശ്രേയാംസ്‌കുമാര്‍ എം.എല്‍.എ. കൈമാറി. മോഷണക്കുറ്റം ആരോപിച്ച് ചിലര്‍ മര്‍ദിച്ച മനുവിനെ നവംബര്‍ 21ന് തിങ്കളാഴ്ച വീട്ടിനുള്ളില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു. വെള്ളന്റെയും കെമ്പിയുടെയും മകനാണ്. പ്രായാധിക്യത്താല്‍ വിഷമിക്കുന്ന വെള്ളനും കെമ്പിക്കും ചികിത്സാസഹായമായിട്ടാണ് മുഖ്യമന്ത്രിയുടെ ജന സമ്പര്‍ക്കപരിപാടി മുഖേന ധനസഹായം അനുവദിച്ചത്. എം.എല്‍.എ.യില്‍ നിന്ന് വെള്ളന്‍ ചെക്ക് ഏറ്റുവാങ്ങി. കെമ്പിയുടെ ചികിത്സയ്ക്ക്‌വേണ്ട അടിയന്തര നടപടികള്‍ സ്വീകരിക്കുമെന്നും ഇക്കാര്യം മന്ത്രി പി.കെ. ജയലക്ഷ്മിയുടെ ശ്രദ്ധയില്‍പ്പെടുത്തുമെന്നും എം.വി. ശ്രേയാംസ്‌കുമാര്‍ എം.എല്‍.എ. പറഞ്ഞു.

 

കുറുവയില്‍ ഉപരോധസമരം തുടങ്ങി

Written by See News Category: WYD
Published on 22 November 2011 Hits: 37

പുല്‍പള്ളി: ജീവനക്കാരുടെ നിയമനവുമായി ബന്ധപ്പെട്ട തര്‍ക്കത്തെ തുടര്‍ന്ന്‌ തൊഴില്‍ സംരക്ഷണ സമിതിയുടെ ആഭിമുഖ്യത്തില്‍ കുറുവയില്‍ ഉപരോധ സമരം ആരംഭിച്ചു. ഇന്നലെ കാലത്ത്‌ മുതല്‍ തൊഴിലാളികള്‍ ടിക്കറ്റ്‌ കൌണ്ടര്‍ ഉപരോധിച്ചു. സമരം മൂലം കുറുവയിലെത്തിയ നിരവധി സഞ്ചാരികള്‍ക്ക്‌ കുറുവയില്‍ കയറാനാവാതെ മടങ്ങേണ്ടിവന്നു.

 

ചുമട്ടുതൊഴിലാളി പ്രശ്‌നം; മാനന്തവാടിയില്‍ സംഘര്‍ഷം

Written by See News Category: WYD
Published on 06 December 2011 Hits: 24

മാനന്തവാടി: ചുമട്ടുതൊഴിലാളി പ്രശ്‌നത്തെ തുടര്‍ന്ന്‌ ഇന്നലെ ഉച്ചയോടെ ടൌണില്‍ സംഘര്‍ഷം ഉണ്ടായി. ചുമട്ടുതൊഴിലാളികളുടെ ജോലി  ക്രമീകരണവുമായി ബന്ധപ്പെട്ട്‌ കഴിഞ്ഞ മാസം ഒരു വിഭാഗം ചുമട്ടുതൊഴിലാളികള്‍ പണിമുടക്ക്‌ നടത്തിയിരുന്നു. സമരം ഒത്തുതീര്‍ക്കുന്നതിന്റെ ഭാഗമായി ഉണ്ടാക്കിയ ധാരണ ലംഘിച്ചതുമായി ബന്ധപ്പെട്ടാണ്‌ ഇന്നലെ സംഘര്‍ഷം ഉണ്ടായത്‌. പരിക്കേറ്റ സിപിഐ മണ്ഡലം സെക്രട്ടറി ഇ.ജെ. ബാബു, ഐഎന്‍ടിയുസി നേതാവ്‌ പി. ഷംസുദ്ദീന്‍, ഷിജു(32), അഷറഫ്‌(35), അമ്മദ്‌(55), മൊയ്‌തൂട്ടി(43), അബു താലിബ്‌(27) എന്നിവര്‍ ജില്ലാ ആശുപത്രിയില്‍ ചികില്‍സയിലാണ്‌. ഇന്നലെ ഉച്ചയോടെയാണ്‌ കോഴിക്കോട്‌ റോഡില്‍ സംഘര്‍ഷം ഉണ്ടായത്‌. ജില്ലാ ലേബര്‍ ഓഫിസര്‍ എല്ലാ വിഭാഗങ്ങളുമായി ചര്‍ച്ച നടത്തി കൈകൊണ്ട തീരുമാനത്തിന്‌ വിരുദ്ധമായി പ്രവര്‍ത്തിച്ച ചെറിയ ഒരു വിഭാഗം തൊഴിലാളികള്‍ ഒരു പ്രകോപനവുമില്ലാതെ യൂണിയന്‍ നേതാക്കളെ ആക്രമിക്കുകയാണുണ്ടായതെന്ന്‌ തൊഴിലാളികള്‍ കുറ്റപ്പെടുത്തി. ഇറക്ക്‌ ജോലി ചെയ്യുന്ന 40 തൊഴിലാളികളും കയറ്റ്‌ ജോലിചെയ്യുന്ന 90 തൊഴിലാളികളും തമ്മിലുളള തര്‍ക്കത്തില്‍ ഇടപെട്ട നേതാക്കള്‍ക്ക്‌ നേരെ അക്രമം ഉണ്ടായതോടെ തൊഴിലാളികള്‍ പണിമുടക്ക്‌ തുടങ്ങി.

സംയുക്‌ത ട്രേഡ്‌ യൂണിയന്റെ നേതൃത്വത്തില്‍ പ്രതിഷേധ പ്രകടനം നടക്കുന്നതിനിടെ നേതാക്കളെ മര്‍ദ്ദിച്ച തൊഴിലാളികളുടെ നേതൃത്വത്തില്‍ കോഴിക്കോട്‌ റോഡിലെ ന്യു ലുലു ഹോംഅപ്ലയിന്‍സിലേക്ക്‌ സാധനങ്ങള്‍ ഇറക്കുന്നത്‌ കണ്ടതോടെ സ്‌ഥാപനത്തിന്‌ നേരെ ആക്രമണം ഉണ്ടായി. ജീവനക്കാര്‍ക്ക്‌ പരുക്കേറ്റു. സംഭവത്തില്‍ പ്രതിഷേധിച്ച്‌ മര്‍ച്ചന്റ്‌ അസോസിയേഷന്റെ നേതൃത്വത്തില്‍ ടൌണില്‍ വ്യാപാരികള്‍ ഹര്‍ത്താല്‍ നടത്തി. വൈകിട്ട്‌ പ്രതിഷേധ പ്രകടനവും നടന്നു. ഗാന്ധിപാര്‍ക്കില്‍ തൊഴിലാളികളും സംഘടിച്ചെത്തിയതോടെ വീണ്ടും സംഘര്‍ഷാവസ്‌ഥ ഉണ്ടായി. ശക്‌തമായ പൊലീസ്‌ സംഘം ടൌണില്‍ നിലയുറപ്പിച്ചിരുന്നു.